Hommage aux Littérateurs Montois dimanche 18 septembre 2022 midi au Jardin du Mayeur

Á TOUS LES CAMERLUCHES,

du haut dé l’ ville, du bas èyé des alintours qui comprenn’nt-té co no langage.

C’est bétôt l’ fiète dé Wallonie qué no biau p’tit trau d’ville n’ manquéroit pou rié au monde dé passer oute, èyé nos autes avec, passqué c’est l’ moumint d’honorer tous les ceusses qu’ont créé et interténu l’esprit ropïeur montois èdpouis deux cints ans.

L’dimanche 18 septimb qui viét au Gardin du Mayeur, à midi, l’ association des Montois Cayaux, inchène avé l’Régence, rind’nt-té ein hommage in musique à ces gaillards-là in lisant leu tesses in public. Suré, qu’ ara du ch ‘nu ! Mais avant ça, à 11 heures, il a avec el messe tout in patois montois à l’ collégiale Sainte-Waudru, ein espectaque, mei.me si on n’ c’oit nié, qu’arrive seul’mint ein caup l’an, d’abord à n’ nié rater. (il ara des chants avé n’ chorale)

C’est l’ fiètte du patois, d’abord ?

Ouais ! Faut bé s’ dire qu’ i n’ a nié dé honte à pa’ler l’ langue dé nos nos tayes, meîme s’il a des geins qui té r’gard’nt-té comme si t’ avois ein trau à t’ maronne ou bé qué l’ pan dé t’ quémiche passoit pau t’ brayette !

In pusss, il a des caups ousqué l’ patois peut iette bé n’ utile ; j’ té dis ça mais jé n’dis rié…Ça t’ est sûr’mint d’jà arrivé d’ quéïr su un taffiard qu’a toudis enn’ afféere pus intéressante qué l’ tienne à raconter èyé qui n’ in finit pus d’ té l’ espliquer in long èyé in large, enne heure dé long.

Au bout d’ chinq minutes dé c’ n’ indormage-là, t’ as qu’ à li dire : « C’est ça, raquies ein caup d’ssus èyé d’minde au Bon Dieu qu’ i gèle ! » Eyé el temps qu’ i compreinne, à r’voir dallé…

Comme dé fut, les ciens qui pal’nt-té co l’ patois i n’ont nié d’ porte dé derrière.

P’t-ête bé qu’ i leu arrive dé vos escouater vos artoiles, mais c’est co tant pire, passqué, ein p’tit moumint après, c’est d’jà raccomodé, roublié. Eyè c’est toute.

C’est pou tout ça qu’i faut qu’el patois dure el pus longmint possibe. Quand ça n’ s’roit foqu’ pou prouver qui ress’ co des vrais Montois à Mons, nié seul’mint les ceusses d’ein jou’ qui viennent-té fée du dallage à l’corde.

D’abord, av’nez nos fée ein p’tit coucou au Gardin du Mayeur. Dimanche 18 septembre à midi, c’est l’ fiette des vrées Montois-Cayaux.

Philippe Yannart